Shtëpia e Bardhë ka mohuar zërat se zëvendëspresidenti Mike Pence është futur në karantinë, pasi sekretarja e tij për mediat Katie Miller, rezultoi e infektuar me koronavirus.
Shtëpia e Bardhë raportoi se Pence ka rezultuar negativ në të gjithë testet e kryera dhe do të jetë në krye të detyrës.
Administrata e kaloi fundjavën duke gjurmuar kontaktet e Miller. Akoma nuk dihet se nga u infektua sekretarja për mediat e zv/presidentit. Shqetësimi është i lartë përsa kohë nuk është ende e qartë panorama se nga erdhi virusi dhe si është shpërndarë.
Vetëm pak ditë më parë edhe shërbyesi personal i presidentit rezultoi i infektuar.
Rastet me Covid-19 në Shtëpinë e Bardhë, bien ndesh me mesazhin e Trump drejtuar shteteve për rihapje të ekonomisë. Trump ka kërkuar nga guvernatorët që të lehtësojnë kufizimet, në mënyrë që ekonomia të ringjallet. Në çdo rast edhe një herë nga Shtëpia e Bardhë është bërë me dijë së si Trump ashtu edhe Pence, do të vijojnë detyrën e tyre e nuk kanë ndërmend të ndahen nga njëri-tjetri.