Teatri Kombëtar, propozimi për shembjen e godinës ekzistuese votohet të premten në Këshillin Bashkiak

Këshilli Bashkiak do të mblidhet të premten për të votuar mbi propozimin për shembjen e godinës së Teatrit Kombëtar.

Pas vendimit të qeverisë për t’ia kaluar godinën në pronësi Bashkisë së Tiranës, në rendin e ditës së mbledhjes të Këshillit Bashkiak është futur vendimi për miratimin e aktekspertizës së Institutit të Ndërtimit, realizuar që në vitin 2018. Mbledhja është parashikuar të nisë në mesditë.

Të mërkurën, Policia Bashkiake shkoi në ambientet e Teatrit Kombëtar për të vendosur një letër përshkruese ku tregohej se ky institucion kalonte zyrtarisht në pronësi të Bashkisë së Tiranës.

Prania e shtuar e forcave të Policisë Bashkiake pranë Teatrit ka nxitur menjëherë reagimin e aktivistëve të Aleancës për Teatrin të cilët janë mbledhur menjëherë duke mos njohur synimet e efektivëve.

Këshilli i Ministrave në mbledhjen e fundit ia kaloi pronësinë e Teatrit dhe truallit të tij bashkisë së Tiranës me qëllim për ndërtimin e një godine të re dhe multifunksionale, por pa të drejtë për ta tjetërsuar këtë pasuri apo t’ia dhënë një pale të tretë. (A2 Televizion)