Besimtarët myslimanë festojnë Fiter Bajramin

Mijëra besimtarë myslimanë në të gjithë Shqipërinë kanë kryer mëngjesin e sotëm faljen e Namazit të Fiter Bajramit, një prej festave më të rëndësishme të kalendarit mysliman.

Pas 30 ditëve agjërim në muajin e Ramazanit, besimtarët kanë përmbyllur këtë muaj të begatë me urimin për më shumë paqe, mirësi, begati dhe mëshirë nga Zoti.

Ndryshe nga vitet e tjera për shkak të pandemisë së koronavirusit, falja nuk është bërë në sheshin Skënderbej në Tiranë, por në xhaminë e Kokonozit nën protokolle të forta sigurie.

Besimtarët që kishin dalë në rrugë ishin të shumtë dhe disa prej tyre u falën në sheshin e vogël përpara xhamisë dhe në distancë nga njëri tjetri

Në qytetin e Korçës falja e namazit të Fiter Bajramit është bërë në xhaminë kryesore “Iljaz Bej Mirahori” në ambientet e jashtme të saj, kjo për shkak të numrit të shumtë të besimtarëve të pranishëm. Myftiu i Korçës Ledian Çikalleshi ka shprehur urimin e tij në këtë festë të Bajramit të Madh për vëllazëri dhe prosperitet.

Edhe në qytetin e Pogradecit të shumtë ishin besimtarët që iu drejtuan xhamive për faljen e Fiter Bajramit. Të rritur dhe të vegjël pas ligjëratave të imamit Mirel Mazelli kryen faljen për t’iu drejtuar më pas shtëpive të tyre ku do të festojnë Bajramin me drekën tradicionale në shtëpi.

Në xhamitë e qytetit të Durrësit, besimtarët kryen faljen e namazit të Fiter Bajramit. Falja filloi në orën 06:07 minuta dhe në Xhaminë e Madhe të qytetit, besimtarët kryen ritet e faljes në ambientet brenda dhe jashtë Xhamisë.

Imami i Xhamisë së Madhe të qytetit, Ervin Qylafku mbajti një ligjërim, ku foli për vlerat e kësaj feste dhe sjelljen që duhet të kenë besimtarët në raport me Zotin dhe të tjerët.