Për 80 orë Shkupi, Kumanova dhe komuna të tjera në Maqedoninë e Veriut, të cilat po regjistrojnë nivel të lartë të infektimeve me Covid-19 do të jenë nën izolim.
Masa e ndalimit të lëvizjes, qe do të zgjasë deri të hënën në orën 05:00, u rikthye pas rritjes së rasteve me koronavirus gjatë ditëve të fundit.
120 raste u raportuan të enjten, pas 953 testimeve të kryera. Me 850 të infektuar aktiv dhe 147 vdekje nga Covid-19, Maqedonia e veriut është vendi më i prekur nga kriza shëndetësore në Ballkanin Perëndimor.
Në pjesën tjetër të vendit, ku situata me pandeminë është më pozitive, lëvizja do të ndalohet nga ora 21 e mbrëmjes deri në 5 të mëngjesit.
Në kuadër të masave të reja, Federata e Futbollit vendosi të ndërpresë përfundimisht kampionatin. Disa lojtarë të skuadrave shqiptare, si Renova dhe Shkëndija, janë aktualisht pozitivë me koronavirus.