Kosova është e gatshme të rikthehet në tryezën e negociatave me Serbinë. Pohimi erdhi nga presidenti Hashim Thaçi, disa ditë pas largimit të masave të reciprocitetit.
Kreu i shtetit mbështeti vazhdimin e dialogut, me synimin për të arritur njohjen reciproke dhe përshpejtimin e anëtarësimit të Kosovës në Organizatën e Kombeve të Bashkuara. Për të arritur këtë, Thaçi kërkoi unitet nga spektri politik.
“Ne përballë Serbisë gjithmonë kemi qenë të bashkuar, si shoqëri, institucione dhe media kemi dalë mirë”, deklaroi ndër të tjerat Thaçi.
Sa i përket udhëheqjes së delegacionit të Kosovës në bisedimet me Serbinë, ai tha se kjo nuk është në garë, por theksoi se përballë Beogradit të gjithë duhet të plotësojnë njëri-tjetrin.
Thaçi shtoi se Prishtina do të punojë për zbatimin e marrëveshjeve të fundit të arritura me Serbinë. Presidenti foli ndër të tjera edhe për pandeminë Covid-19 gjatë një konference për shtyp, ku kërkoi respektim të masave kufizuese të vendosura për të frenuar përhapjen.