Partia Demokratike ka kërkuar hetimin nga Prokuroria të kryeministrit Edi Rama për shpërdorim detyre për dëmin prej 109 milionë eurosh që do të paguhet nga buxheti i shtetit, pas vendimit të Arbitrazhit për betejën ligjore me sipërmarrësin Becchetti.
Enkelejd Alibeaj tha se kryeministri duhet ta paguajë dëmin nga pasuria e tij, për shkak se çështja përfundoi në gjykatë si pasojë e luftës personale të kryeministrit me sipërmarrësin italian.
“Lufta e shpallur ndaj sipërmarësit italian Francesco Becchetti për arsyen e vetme se zotëronte një media kritike ndaj qeverisë, ndaj Edi Ramës dhe Erion Veliajt, po u kushton qytetarëve të vendit 109,5 milionë euro. Si për shumë gjëra të tjera, premtimet e Edi Ramës se nuk do të paguajmë asnjë qindarkë për luftën e tij personale ndaj Becchettit, rezultuan një gënjeshtër e madhe. Gjykata Ndërkombëtare e Arbitrazhit i dha të drejtë sipërmarrësit dhe i kërkon Shqipërisë të paguajë dëmin. Në platformën tonë antimafia kjo është një nga pikat kryesore. Zyrtari përgjegjës për nje vendim të gabuar që i shkakton dëm buxhetit, duhet të paguajë me pasuritë e tij. Është detyrë e drejtësisë të hetojë dhe të marrë nën përgjegjësi penale kryeministrin e vendit për shpërdorim detyre. Shqiptarët nuk kanë pse paguajnë nga taksat e tyre 109 milionë euro për luftën personale të Edi Ramës me median e lirë dhe biznesin”, tha Alibeaj.