“Rruga me drita të kuqe” në Hamburg të Gjermanisë kërkon rikthimin në aktivitet pas muajsh ndërprerje për shkak të pandemisë koronavirus.
Për të përçuar fjalën e tyre tek autoritetet, punonjëset organizuan dhe një protestë paqësore. Ata theksojnë se me rihapjen e dyqaneve dhe bizneseve të tjera, aktiviteti i tyre është lënë jashtë vëmendjes dhe nën një izolim të vazhduar duke i privuar nga jeta e përditshme edhe pse nuk përbëjnë rrezik të lartë për shëndetin.
Për një natë të vetme, “Herbertstrasse”, që po qëndron në errësirë nga marsi, hapi qepenat dhe dritat e kuqe dhe punonjëset u vendosën sërish në dritare teksa mbanin në fytyrë një maskë teatrale. Një protestuese, madje, luajti këngë folku në violinë.
“Profesioni më i vjetër në botë ka nevojë për ndihmën tuaj”, shkruhej në një pankartë pranë një shtëpie publike të licencuar në lagjen e njohur të Hamburgut për jetën e natës. Protestueset u ankuan se mbyllja e vazhdueshme e aktivitetit po i detyron që të kalojnë në praktika ilegale dhe sërish në rrugë, që është një mënyrë shumë e rrezikshme e të punuarit.
Ndërkohë, prostitucioni tolerohet në Gjermani dhe punonjëset e seksit paguajnë taksa. Një ndër kërkesat që ushtruan gjatë protestës ishte që ato të përfitonin nga pakoja e ndihmës, të cilën qeveria federale e ka vendosur në dispozicion të biznesit të vogël.