Besimtarët myslimanë në të gjithë botën kremtojnë sot festën e Kurban Bajramit.
Në Kosovë nuk pati falje masive në sheshe apo xhami për shkak të rrezikut të përhapjes së pandemisë Covid-19. Përfaqësues të institucioneve shtetërore e fetare bënë thirrje që si rezultat i situatës së krijuar me pandeminë Covid-19, kjo festë të kalojë pa vizita familjare e tradicionale.
Presidenti i Kosovës, Hashim Thaçi uroi të gjithë besimtarët myslimanë duke bërë thirrje për solidaritet dhe respektim të protokollit të sigurisë.
Një mesazh urimi ka ardhur edhe nga kryeministri, Avdullah Hoti, i cili ftoi besimtarët që këtë festë ta kremtojnë në shtëpi pasi kështu kontribuojnë në menaxhimin e situatës me pandeminë.
“Duke qëndruar në shtëpi i ndihmojmë heronjtë e vijës së parë të frontit, stafin tonë shëndetësor, të cilët po përballen me këtë pandemi për gjashtë muaj pa pushim”, u shpreh shefi i qeverisë.
Ndërkohë, mesazhe urimi për qytetarët e Kosovës patën edhe krerët e të gjitha partive politike dhe zyrtarë të tjerë të rëndësishëm të vendit.