Parashikimi i UNDP: Covid-19 mund të trondisë ekonominë e shëndetësinë

Programi i Kombeve të Bashkuara për Zhvillimin parashikon tronditje të sistemit shëndetësor dhe atij ekonomik nëse qeveria nuk merr masat e duhura për përballimin e situatës së krijuar nga Covid-19 në vendin tonë.

UNDP, në një raport mbi planet social-ekonomike të Shqipërisë, ka kaluar në sitë problemet me të cilat po përballet shëndetësia si pasojë e koronavirus.

“Sistemi shëndetësor në Shqipëri, mund të tronditet nga përhapja e Covid-19, nëse nuk përballohet si duhet. Sikurse nënvizohet edhe në analizën e situatës, vdekjet nga virusi mund të tejkalohen së shpejti nga vdekjet që ndodhin për shkak të sëmundjeve të parandalueshme ose të trajtueshme, që nuk do të menaxhoheshin dot për shkak të mosfunksionimit të sistemit shëndetësor’.

UNDP sugjeron rritjen e numrit të testimeve, gjurmimin e rasteve dhe rritjen e kapaciteteve laboratorike dhe të emergjencës, për të evituar rritjen e numrit të viktimave nga koronavirusi.

Sipas organizatës ndërkombëtare, ekonomia shqiptarë ka marrë një goditje të fortë nga Cocid 19 dhe rrezikohet që numri i të papunëve të rritet me më shumë se 200 mijë.

“Një vlerësim i fundit i Bankës Botërore tregon se varfëria ekstreme mund të dyfishohet në një kohë të shkurtër. Pa masa të menjëhershme, varfëria mund të rritet nga 40-44%, që do ishte e ngjashme me situatën në 2012 ose 2005, ose shtim të të varfërve nga 115-230 mijë.

Parashikimet e Bankës Botërore vlerësojnë tkurrje të ekonomisë me 5%. Sipas UNDP, qeveria duhet të forcojë iniciativat në mbështetje të turizmit, të ndihmojë ndërmarrjet e vogla dhe të mesme dhe të forcojë koordinimin në nivel institucional për të mbrojtur ekonominë.