Sondazh: Destinacionet e fundjavave tuaja janë:
  • Bregdeti 67%
  • Zonat malore 33%
  • Qendrat historike 0%

Shano: Pritet një shtator i “nxehtë”, BE nuk na tërheq më prej dore

Nga A2 CNN
25 Gusht 2020, 10:50 | Politikë
Shano: Pritet një shtator i “nxehtë”, BE nuk na

Pritet një shtator i nxehtë politikisht dhe ekonomikisht, dhe nxehtësinë do ta ndiejnë familjet shqiptare, jo ata në pushtet”. Ky është parashikimi i analistit Dritan Shano për sezonin politik që pritet të hapë dyert e Kuvendit, por edhe një seri çështjesh delikate.

Shano ka propozuar respektimin e një liste kushtesh, për të cilat politika shqiptare duhet të ndërgjegjësohet. “Është lista e 15 kushteve  të Bundestagut ndaj Shqipërisë, e aprovuar nga seanca plenare e parlamentit Europian, si kurrë ndonjëherë. Por nuk ka asnjë vullnet për të plotësuar ato kushte”, thotë ai për A2, dhe kjo mungesë vullneti vjen nga fakti që “qeveria ka një vizion afatgjatë për pushtet mbi shqiptarët, por jo për shqiptarët”.

Sipas analistit, “Shqipëria ndodhet me një këmbë, mazhoranca zotëron ekzekutivin dhe nuk kemi një pushtet gjyqësor funksional, qeveria mund të bëjë çdo gjë me pronën publike edhe private, pa i dhënë llogari askujt”, duke kujtuar aty shembjen e Teatrit Kombëtar në një kohë ku sipas tij, ekzekutivi duhet të mendonte për demat e pallogaritshme të pandemisë.

Për Shanon, pjesa ekonomike vijon të jetë problematike, sepse qeveria nuk arriti të injektonte para në ekonomi “përtej dy paketave, që ishin një ndihmë sociale prej 5.5 euro në ditë për 300 mijë persona, ndërkohë që të gjithë sektorët ekonomikë janë në gjunjë dhe nuk kanë marrë ndihma nga qeveria, që mohoi edhe mundësinë e një pakete të tretë”.

Sipas tij vullneti për të përmbushur disa kushte bazë do të jetë vendimtare në kuadrin e anëtarësimit, edhe për një ndryshim të qasjes europiane ndaj integrimit të vendeve kandidate. “Ka ndodhur një ndryshim drastik të BE ndaj vendeve të Ballkanit Perëndimor, vala e fundit e zgjerimit ishte moment penalizues për vendet që nuk ishin pjesë e kësaj vale, sepse BE ndjeu nevojën të ndalonte dhe të merrte frymë për të absorbuar vende me sisteme vlerash dhe institucionesh të ndryshme nga ato perëndimore”.

Sipas Shanos, europianët “nuk e heqin dorën nga supi jonë, por nuk na tërheqin më prej dore. Duhet të tregojmë se e kemi seriozisht reformën në drejtësi, trajtimin e pronës, së medies së lirë, të korrupsionit. Po nuk treguam vullnet për këtë, dhe individë me qasje perëndimore, ata do kenë problem për t’u afruar.

A2 CNN Livestream

Ditari nga Bruna Çifligu