NATO i shtrin dorën e bashkëpunimit Serbisë. Aleanca ushtarake pohoi për Radion, Evropa e Lirë, se nuk ka planifikuar asgjë specifike me Beogradin në muajt e ardhshëm, por mbetet e përkushtuar për një partneritet, në interes të stabilitetit dhe sigurisë në rajon.
Komenti i NATO-s erdhi pasi Serbia vendosi që për 6 muajt e ardhshëm të pezullojë të gjitha stërvitjet dhe aktivitetet ushtarake.
Vendimi erdhi pasi qeveria e Bjellorusisë raportoi se pjesëtarë të Forcave të Armatosura të Ushtrisë së Serbisë do të marrin pjesë në stërvitjen e quajtur “Vëllazëria Sllave”, pjesë e së cilës është dhe Rusia.
Ky event mbahet në mes të këtij muaji. Ministri serb i Mbrojtjes, Aleksandër Vulin tha se ky pezullim erdhi nga presioni i tmerrshëm dhe i pamerituar që Bashkimi Europian ia bën Beogradit zyrtar.
Ndërkohë, gjatë së enjtes, presidenti serb, Aleksandër Vuçiç, zhvilloi një bisedë telefonike me homologun rus, Vladimir Putin, duke konfirmuar partneritetin mes vendeve.