Nëse shkollat kishin marrë masa për të respektuar masat antikoronavirus, brenda rrethimit të tyre, mesa duket nuk ishte marrë parasysh gjithçka.

Pamjet nga shkollat e ndryshme të kryeqytetit tregojnë rrezikun e madh të transmetimit të virusit që në dyert e tyre. Prindërit që kanë shoqëruar fëmijët me maska në fytyrë dhe që në çantat e shkollës nuk kanë vetëm libra e mjete shkollore, por edhe gjithçka duhet për të ulur rrezikun e infektimit, nuk ia kanë dalë të jenë aq të kujdesshëm në dyert e shkollës.

Dyndjet e tyre, edhe për shkak të mungesës së transportit të nxënësve, kanë qenë të pashmangshme.

Policia e Tiranës nga ana tjetër doli në një deklaratë jo vetëm për të treguar masat e sigurisë në shkolla, por edhe për të bërë me dije se do të ndjekin në mënyrë të veçantë pikërisht situata të tilla që bien ndesh me protokollin e sigurisë kundër koronavirusit.