Ekonomia shqiptare do të bjerë me 8,4% këtë vit. Një fjali tashmë që ngjan e përsëritur prej javësh, teksa institucionet financiare ndërkombëtare marrin në analizë ecurinë e ekonomisë dhe masat e marra prej qeverisë. Kësaj radhe është Banka Botërore që jep këtë parashikim edhe më të zymtë nga sa priste në mesin e vitit.
Recesioni do të ndikohet veçanërisht nga rënia e thellë e konsumit dhe tkurrja e eksporteve. Goditja e sektorit të turizmit shihet, gjithashtu, si një faktor kyç, ndërsa Banka vlerëson se masat e qeverisë nuk kanë bërë asgjë për të ndihmuar punonjësit e shumtë në të zezë, që sot përballen me vështirësi të mëdha financiare.
Përkundër shifrës së recesionit, Banka Botërore parashikon edhe një rritje të borxhit publik në nivelin 81,3% dhe vështirësi të mëdha në mbledhjen e taksave në vijim. Rimëkëmbja në vijim parashikohet e dobët, teksa edhe rihapja e vendeve të mbyllura të punës do të hasë shumë vështirësi.