Ambasadorja Kim takon kryetaren e KPA-së: Sfidë përshpejtimi i procesit të rivlerësimit

kim shtylla 1100x620

Ambasadorja amerikane Yuri Kim dhe këshilltarja Ligjore e OPDAT në Shqipëri Michelle Lakomy, janë takuar sot me kryetaren e Kolegjit të Posaçëm të Apelimit, Albana Shtylla.

Në deklaratën e shpërndarë për mediat thuhet se Kryetarja e KPA-së e njohu ambasadoren me sfidat e procesit të rivlerësimit, nevojën dhe mundësitë për përshpejtimin e tij, si dhe e falenderoi për mbështetjen e vazhdueshme për institucionet e rivlerësimit, për kryerjen me përgjegjësi dhe profesionalizëm të funksionit të tyre kushtetues.

Po ashtu, Kryetarja e Kolegjit të Posaçëm të Apelimit informoi ambasadoren Yuri Kim edhe në lidhje me përgatitjet e Kolegjit për shqyrtimin e çështjeve të juridiksionit disiplinor për sistemin e drejtësisë, që kjo gjykatë pritet të ketë me fillimin e funksionimit të plotë të institucionit të Inspektorit të Lartë të Drejtësisë dhe mbi vendimmarrjet përkatëse të Këshillit të Lartë Gjyqësor dhe Këshillit të Lartë të Prokurorisë.

Fokus i veçantë gjatë takimit, iu dha edhe kërkesave dhe shqetësimeve të gjyqtarëve, sa i përket funksionalitetit të Kolegjit të Posaçëm të Apelimit dhe vijueshmërisë normale të procesit të rivlerësimit, duke garantuar pavarësinë në vendimmarrjen e Kolegjit.

Kryetarja Shtylla e konsideroi të domosdoshme për ecurinë e procesit të vetting-ut, vazhdimin e mbështetjes të partnerëve ndërkombëtarë, si dhe vëmendjen e posaçme të tyre për suksesin e procesit të rivlerësimit.