Ngushtohen opsionet e Trump, ligjvënësit e Miçiganit: Nuk kemi informacion që do të ndryshonte rezultatin e zgjedhjeve

trump 8 1100x620

Donald Trump bën një tjetër hap pas në përpjekjen e tij për të përmbysur humbjen e tij në zgjedhjet amerikane, pasi ligjvënësit e Miçiganit treguan se ata nuk do të kërkonin të zhbëjnë fitoren e parashikuar të Joe Biden në shtet.

Udhëheqësit kryesorë republikanë të legjislaturës së shtetit Miçigan thanë pas një takimi me Presidentin Donald Trump, të premten, se ata nuk kishin ndonjë informacion që do të ndryshonte rezultatin e zgjedhjeve presidenciale në këtë shtet, ku demokrati Joe Biden mundi republikanin Trump.

“Ne ende nuk jemi vënë në dijeni për ndonjë informacion që do të ndryshonte rezultatin e zgjedhjeve në Miçigan dhe si udhëheqës legjislativë, do të ndjekim ligjin dhe procesin normal në lidhje me elektorët e Miçiganit,” thanë në një deklaratë të përbashkët udhëheqësi i shumicës republikane të Senatit të Miçiganit Mike Shirkey dhe kryetari i Dhomës së Përfaqësuesve Lee Chatfield.

Presidenti aktual Trump u takua në Shtëpinë e Bardhë me udhëheqësit e legjislaturës së Miçiganit ndërsa fushata e tij vazhdon të sfidojë fitoren e zotit Joe Biden, bazuar në akuza të paprovuara për mashtrim të votuesve.

Pas dështimit me disa sfida në gjykatë për të minuar fitoren e zotit Biden duke vënë në dyshim ligjshmërinë e votave të numëruara, presidenti dhe këshilltarët e tij ligjorë po lidhen drejtpërdrejt me udhëheqësit legjislativë republikanë të shtetit, për të parë nëse ata janë të gatshëm të ndërmarrin hapa për të ndryshuar vullnetin e votuesve.

Më herët të premten, Xhorxhia i dha presidentit të SHBA-së një goditje tjetër duke vërtetuar marzhin e fitores së Biden.

Demokrati është vendosur të marrë detyrën më 20 janar si presidenti i 46-të i SHBA.