Në 31 dhjetor, Operacioni Forca e Ligjit pushon së ekzistuari. Pas kësaj date, “djemve problematikë” nuk do t’u dërgohen më formularë për justifikimin e pasurisë. Burimet thonë se Ministria e Brendshme kishte menduar fillimisht të shtynte me 12 muaj të tjerë luftën e saj kundër terrorit dhe krimit të organizuar, por duket se ka ndryshuar mendje.
Pavarësisht se i ka mbetur edhe një muaj, Sandër Lleshaj ka përgatitur ndryshime të tjera në aktin normativ për OFL, të cilat parashikohet të kalojnë brenda vitit në qeveri. Pa pritur vendimet e formës së prerë të gjykatave, ministria mendon se subjektet që janë referuar në SPAK për fshehje pasurie, të mos kenë të drejtë për të përfituar tenderë e PPP për 3 vite.
Propozimet e siguruara nga A2, që mbajnë firmën e ministrit të Brendshëm, detyrojnë SPAK të merret me dosjet e OFL, edhe pas shkrirjes së kësaj strukture në 31 dhjetor. Nga praktika e deri tanishme, SPAK i ka kthyer mbrapsht OFL-së për plotësim dokumentacioni e parregullsi, një sasi të konsiderueshme dosjesh. Ndryshimet e reja që propozon ministri Lleshaj nuk saktësojnë kush do të merret me korrigjimin e dosjeve, pas 1 janarit , kur OFL të jetë shkrirë.