100% efektive në parandalimin e rasteve të rënda të koronavirusit, vaksina e Modernas dërgohet sot për miratim

Kompania farmaceutike Moderna do të aplikojë sot në Administratën e Ushqimit dhe Barnave të SHBA (FDA) për autorizimin e vaksinës së saj Covid-19.

Kompania do t’i kërkojë FDA të rishikojë një grup të zgjeruar të të dhënave që tregon se vaksina është 94.1% efektive në parandalimin e Covid-19 dhe 100% efektive në parandalimin e rasteve të rënda të sëmundjes.

“Kjo është e habitshme” tha dr. Paul Offit, një anëtar i komitetit këshillues të vaksinave të FDA. “Këto janë të dhëna të mahnitshme.”

Një kompani tjetër, Pfizer, ka aplikuar për autorizimin e FDA për një vaksinë të koronavirusit, me të dhëna të efikasitetit shumë të ngjashme me rezultatet e Moderna.

FDA pritet të shqyrtojë aplikimet e të dyja kompanive në dhjetor dhe Anthony Fauci, drejtori i Institutit Kombëtar për Alergji dhe Sëmundje Infektive, tha se ai pret që vaksinat e para në SHBA të kryhen nga fundi i dhjetorit.

Deri në fund të vitit 2020, Moderna pret që të ketë afërsisht 20 milionë doza të vaksinës së saj të disponueshme në Shtetet e Bashkuara dhe është në rrugën e duhur për të prodhuar 500 milionë deri në 1 miliard doza globale vitin e ardhshëm, sipas njoftimit të kompanisë të hënën.