Socialistët e kërkonin votën e emigrantëve që kur ishin në opozitë, por pas 2 mandatesh qeverisjeje, mundësimi i saj është ende në pikëpyetje.
Pavarësisht zvarritjeve politike, numri dy i PS, shpreson që më 25 prillin e ardhshëm, kjo të realizohet.
I pyetur nga A2, lidhur me një tjetër detyrim që rrjedh nga marrëveshja e 5 qershorit me opozitën jashtëparlamentare për Reformën Zgjedhore, siç është miratimi i ligjeve që do të shoqëronin kodin, Balla pranon vonesën, ndërsa pohon se do të punohet deri në fund të sesionit.
E në kohën kur reforma zgjedhore ende është e mbetur gjysmake, Shqipëria nuk ka plotësuar as kushtin tjetër të Brukselit për tryezën e parë ndërqeveritare: funksionimi i Gjykatës Kushtetuese.
Fjalët e Angela Merkel, që shtynë për vitin tjetër pritshmëritë, për Taulant Ballën nuk ngarkojnë me përgjegjësi Tiranën zyrtare.
Socialisti u shpreh besimplotë se brenda dhjetorit, anëtarët e rinj të Gjykatës Kushtetuese do të mund të veshin “togat e zeza” dhe ligji për mediat, tjetër kusht i kërkuar nga Brukseli, do të miratohet në përputhje me faktorin ndërkombëtar.