Sondazh: Destinacionet e fundjavave tuaja janë:
  • Bregdeti 67%
  • Zonat malore 33%
  • Qendrat historike 0%

Akuzat për bllokimin e projektit të “Lungomares”, Presidenca: Nuk do të lejojmë shpërdorimin e fondeve për qëllime elektorale

Nga A2 CNN
4 Janar 2021, 20:34 | Politikë
Akuzat për bllokimin e projektit të “Lungomares”,

Pas akuzave nga Vlora të kryeministrit Edi Rama, se presidenti Ilir Meta ka bllokuar projektin e vijimit të Lungomares vjen dhe reagimi i zyrës së shtypit të Presidencës.

Përmes një komunikate për shtyp, këshilltari për mediat Tedi Blushi shkruan se presidenti në mënyrë të përsëritur ka kërkuar informacion në lidhje me termat financiar të kësaj huaje dhe asnjë herë nuk ka marrë përgjigje.

Sipas Blushit, presidenti është i vendosur që të mos lejojë shpërdorimin e fondeve shtetërore për qëllime elektorale.

Reagimi i Presidencës

Pas inskenimeve dhe deklaratave të papërgjegjshme, të bëra sot në Vlorë, nga Kryeministri ende në detyrë, për nevoja të propagandës së tij elektorale, jemi të detyruar të bëjmë publik qëndrimin zyrtar të Presidentit të Republikës Sh.T.Z Ilir Meta: “Mbi përmbushjen e detyrimeve kushtetuese dhe ligjore për lidhjen e marrëveshjes së Huasë ndërmjet Republikës së Shqipërisë dhe Fondit Saudit për Zhvillim, për Projektin e ‘Rehabilitimit dhe ndërtimit të objekteve në afërsi të rrugës bregdetare (Vlorë-Orikum)’”.

Nga kjo letër, drejtuar Ministrisë së Financave dhe Ekonomisë, si dhe Ministrisë për Europën dhe Punët e Jashtme, evidentohet qartë se Presidenti Meta në mënyrë të përsëritur ka kërkuar informacion mbi arsyet pse nuk është respektuar procedura kushtetuese dhe ligjore për t’u pajisur me autorizim nga Kreu i Shtetit, për të negociuar termat financiarë të një marrëveshje huaje, që lidhet në emër të Republikës së Shqipërisë.

Është tashmë e qartë se, Kryeministri ende në detyrë synon, që në shkeljet e rënda për këtë marrëveshje, të përfshijë dhe Presidentin e Republikës, me qëllim, që këtë model antikushtetutshmërie, ta përdorë edhe në praktika të tjera të ngjashme, që Qeveria ka në proces.

Presidenti Meta, sikundër ka bërë publike, është i vendosur dhe nuk do të tolerojë në asnjë rast shkeljen e Kushtetutës.

Presidenti Meta, garanton qytetarët e Qarkut të Vlorës dhe të gjithë Shqipërisë se është i vendosur të mbrojë interesin publik dhe njëkohësisht do të respektojë kërkesat e tyre për investime publike, pa i lënë shteg Kryeministrit ende në detyrë, që të shpërdorojë fondet shtetërore për qëllime selektive elektorale.

A2 CNN Livestream

Ditari nga Bruna Çifligu