Shano: Rëndësi nuk ka çfarë bën me Turqinë, por çfarë nuk bën me BE-në

Vizita e kryeministrit Rama në Turqi dhe situata ekonomike e politike në prag të zgjedhjeve të 25 prillit janë komentuar në studion e “Dita Jonë” nga ekonomisti Dritan Shano.

Duke folur për vizitën e kryeministrit në Turqi, Shano thotë se Shqipëria duhet të drejtohet nga Perëndimi, pasi çdo tentativë për t’i devijuar këtij objektivi e vonon dhe krijon ngërçe në rrugën e integrimit. Sipas tij, vokacioni i Ramës kërcënues ndaj BE-së në Turqi nuk është i shqiptarëve, pasi shqiptarët nuk kërkojnë azil në Turqi, por në vendet e BE-së.

“Nuk më bën përshtypje se si e pritën Ramën në Turqi, por duhet parë fatura e investimeve që sjell në Shqipëri. Strategjikisht, Shqipëria duhet të drejtohet nga Perëndimi. Çdo tentativë për t’i shkarë këtij objektivi e vonon dhe krijon ngërçe të panevojshme në atë rrugë. Vokacioni kërcënues i Ramës ndaj BE-së nuk është i shqiptarëve se nuk kërkojnë azil në Turqi, por në vendet e BE”.

Në këndvështrimin e tij, Shano thotë se Shqipëria është më e rëndësishme për Turqinë sesa Turqia për Shqipërinë, duke pasur parasysh zgjerimin si sferë influence në rajon të Turqisë.

“Turqia, vitet e fundit shfaq marrëdhënie jo të mira me Perëndimin, sepse Erdogani ka tendencë autoritare të spikatur. Ai ka agjendë që kërkon të detyrojë t’u hapë rrugë atyre për zhvillimin në Mesdhe dhe ka marrëdhënie të acaruar me BE-në.

Turqi është e rëndësishme për Shqipërinë, por investimet turke në Shqipëri dhe ajo që ka në mendje për t’u zhvilluar e zgjeruar si sferë influence e bën që Shqipëria të jetë më e rëndësishme për Turqinë, sesa Turqia për Shqipërinë”.

Shano i sugjeron Ramës që të gjejë një shtet tjetër të madh ku të varë xhaketën dhe jo të përdorë Turqinë, ndërkohë që thotë se e shqetëson ajo që nuk bën Rama.

“Rama të gjejë shtet të madh tjetër, ku të varë xhaketën, dhe jo të përdorë Turqinë. Nuk më shqetëson faktin që pse Rama shkon në Turqi, por pse nuk shkon në Paris e Bruksel e vende të tjera të BE-së. Mbështetësi ynë në rrugën e integrimit është Italia. Mua më shqetëson ajo që nuk bën Rama dhe jo ajo që bën”.

I pyetur për vizitën e Ramës në Greqi pas Turqisë, Shano thotë se pesha e Shqipërisë në të dy këto vende është e parëndësishme.

Sa i takon zgjedhjeve të 25 prillit, Shano ripërsëriti qëndrimin e tij se ato janë të rrezikuara sa kohë nuk ka Gjykatë Kushtetuese dhe të Lartë plotësisht funksionale, ndërsa theksoi se PD është gati të hyjë në zgjedhje dhe misioni i Bashës është ta sjellë në pushtet. Sa i përket listës së deputetëve, ai thotë se PD ka në dispozicion njerëzit e duhur në përputhje me pritshmëritë e qytetarëve.

“Misioni i opozitës dhe Bashës është të sjellë PD në pushtet dhe për këtë ka marrë mbështetjen e të gjithëve ne. Për mua, zgjedhjet janë sa afër dhe larg se asnjëherë nuk i dihet ç’ndodh me virusin.

Zgjedhjet janë të rrezikuar se ende nuk ka një Gjykatë të Lartë dhe Gjykatë Kushtetuese që t’i mbrojë. PD ka kohë që është gati të hyjë në zgjedhje. E vetmja gjë që PD nuk po shpalos ende është lista e deputetëve, por njerëzit që ka në dispozicion është ai që duhet. Mbetet që të gjithë shqiptarët ta lexojnë atë që PD do propozojë. Basha ka  komunikim me të gjitha shtresat dhe me rininë. Ka dalë në komunikim me më të prekurit nga ekonomia dhe e ardhmja e tyre”.