Mjanmari ka bllokuar hyrjen në Facebook, disa ditë pasi ushtria rrëzoi qeverinë demokratike me një grusht shteti. Zyrtarët thonë se rrjeti social, që për shumë është qasja e vetme në internet, do të bllokohet për “hir të stabilitetit”.
Liderja e zgjedhur, Aung San Suu Kyi është arrestuar gjatë grushtit të shtetit dhe policia ka ngritur akuza kundrejt saj.
Sekretari i Përgjithshëm i Kombeve të Bashkuara, Antionio Guterres, i ka bërë thirrje komunitetit botëror që të sigurojë që puçi i ushtrisë të dështojë. Gjysma e 53 milionë banorëve të Mjanmarit përdorin Facebook, platformë, e cila pa ngarkuar fotografi ose video është falas dhe për shumë sinonim i internetit.
Gjatë ditëve të kaluara, aktivistët kishin ngritur një faqe në Facebook për të bashkërenduar kundërshtimin e grushtit të shtetit. Kompania amerikane kërkon zhbllokimin, në mënyrë që njerëzit në Mjanmar të mund të komunikojnë me familjet dhe miqtë e tyre dhe të marrin informacione të rëndësishme. Por, ministrja e Komunikimeve dhe Informacionit tha se platforma e mediave sociale do të bllokohet, deri në 7 shkurt.