Vdekjet nga koronavirusi vijojnë të larta, Pipero: Pacientët vijnë vonë dhe rëndë në spital

Rëndimi i situatës nga pandemia ka rritur jo vetëm infektimet dhe shtrimet në spital, por edhe humbjet e jetës. Shkurti ishte muaji më i keq për vdekjet e ndodhura nga koronavirusi në vend, ku zyrtarisht raportohen 416 jetë të humbura.

Edhe fillimi i marsit shënoi shifra të larta të fataliteteve. Pëllumb Pipero, mjeku i spitalit Covid1, tregon disa nga arsyet e rritjes së vdekjeve në këtë periudhë, ku shkaku kryesor është vajtja me vonesë në spital.

“Vijnë me ndërlikime të sëmundjes, pas 7-8 ditësh, ndonjëherë edhe pas 14 ditësh që kanë ndenjur në shtëpi”, thotë Piero. “Ka një lloj skepticizmi për të ardhur në spitale, ndërkohë që spitali nuk është zgjedhje, por për shumë është zgjidhje.”

Me ngrohjen e motit dhe frekuentimin e ambienteve të hapura, Pipero thotë se situata pritet të ndryshojë në mes të marsit. “Deri nga gjysma e marsit numri do të jetë në këto nivele, edhe më i lartë, besoj unë”, thotë mjeku.

I pyetur nëse  duhen ashpërsuar masat anti-Covid, Pipero ka vendosur të presë vlerësimin e Komitetit Teknik. Ndërsa qytetarëve u bën thirrje të respektojnë masat në fuqi. “Përpara se të shkojmë të shtrëngimi i masave, të respektojmë masat. Doemos të vendosim maskën kur hipin në transportin publik, edhe në shkolla të respektohen masat e higjienës”.

Në këtë periudhë, spitalet Covid janë të mbingarkuar për shkak të fluksit të lartë të shtrimeve. Mjeku i spitalit infektiv tregon se nuk mungojnë as pacientët në moshë të re, mbi 23 vjeç, të cilët kalojnë forma të rënda për shkak të ngarkesës së lartë të virusit.