Largimi i Hysit nga PS, Bushati: Do ta risjellim. Mendojmë për të dy stolat, ekzekutivin dhe legjislativin

Largimi i nënkryetares së Parlamentit, Vasilika Hysi, nga Partia Socialiste, është bërë për efekt të harmonizimit të legjislativit dhe ekzekutivit. Kështu u shpreh drejtuesi i Degës së PS-së për Tiranën, Ervin Bushati, i cili vlerësoi figurën e Hysit dhe tha se PS-ja do ta risjellë atë. I ftuar në Ditari në A2, ai deklaroi se PS-ja po luan në një stol më të gjerë se opozita dhe, sipas tij, do të jetë forcë e parë politike pas zgjedhjeve të 25 prillit.

“Hysi është një nga figurat kryesore të reformës në drejtësi që ka qenë kryereforma e qeverisë Rama. Është bërë një punë shumë e madhe. Hysi për 3 mandate ka qenë figura kryesore e PS-së. Do të  jetë kontribuuese e PS-së. Është figurë akademike dhe do të ketë harmonizimin që PS do ta risjellë. Ne do të jemi forcë e parë politike, do kemi mazhorancën dhe do të harmonizojmë legjislativin dhe ekzekutivin. Po luajmë në një stol më të gjerë se opozita që me tramvajin e vet ka futur vetëm 8 figura. Është hera e parë që Basha bën llogaritë mirë, e di që do të marrë vetëm 8 deputetë”.

Të njëjtin shpjegim dha Bushati edhe kur u pyet për mungesën e Fatmir Xhafajt.

“Nuk mund të flas për kolegët me më shumë kontribute se unë. Janë pjesë e PS-së, janë në fushatë dhe mos harrojmë që jo të gjithë mund të jenë aty. Ne jemi të gjithë në një tavolinë”

I pyetur për imazhet që po i përcjell publikut, nisur edhe nga prezantimi i kandidates Najada Çomo, ai tha se PS-ja rinovohet 50 me 50. Dhe kjo, sipas tij, bëhet për efekt të legjislativit dhe ekzekutivit.

“Në Tiranë ka 54% të elektoratit. Ne kemi një ekip shumë të gjerë dhe kemi një stol të parë dhe të dytë, dhe ekzekutiv e legjislativ. Ka një rinovim të legjislativit. PS-ja e ka 50 me 50 rinovimin”.

Bushati theksoi se do të ishte precedent i gabuar, nëse rrotacioni vjen për shkak të mbajtjes së radhës dhe jo të punës.

“Politika është një garë në realitet dhe nuk mund të krahasohemi me Spanjën dhe Francën, unë jam i qartë se qytetarët kanë një vendimmarrje të rëndësishme këtë herë. Ka ikur koha e Enverit kur lije qumështin në radhe dhe pret 8 vjet të gdhihesh kryeministër. Do ishte precedent i gabuar që një kryeministër të zgjidhej se mban radhën, i binte që të mos punonte, se puna është më pak e rëndësishme se rrotacioni. Rrotacioni nuk vlen kështu. Zgjidhet ai që ka punuar dhe jo ai që ka mbajtur radhën.”

Ai theksoi se PS-ja ka mbajtur premtimet sa i takon edhe rritjes ekonomike dhe tha se qytetarët dinë të bëjnë dallimin mes Gërdecit, sipas tij, të shkaktuar nga Berisha dhe tërmetit nga natyra.