Mbrëmja e së dielës ishte dramatike për një prej futbollistëve të PSG. Angel Di Maria u zëvendësua në minutën e 62-të, pasi një telefonatë e familjarëve të tij vuri në dijeni drejtorin sportiv Leonardo, se shtëpia e argjentinasit kishte rënë pre e një grabitjeje të dhunshme.
Me të mësuar lajmin, drejtuesi i klubit njoftoi trajnerin Pochettino, i cili bëri të njëjtën gjë me futbollistin, i cili u largua menjëherë nga stadiumi në drejtim të familjes.
Sipas mediave franceze, edhe banesa e kapitenit të PSG, Marquinhos, u grabit mbrëmjen e djeshme.
Sa i përket ndeshjes, Paris Saint Germain humbi një mundësi të shkëlqyer për të arritur skuadrën e Lille në krye të klasifikimit. Kampionët e Francës nuk përfituan nga barazimi i udhëheqësve, madje u mundën nga Nantes 2-1, duke lënë garën për titull të hapur dhe më interesante se asnjëherë në vitet e fundit, kur kanë mbetur 9 javë nga fundi i Ligue One.
Paris arriti të gjejë golin me Draxler, por u përmbys nga miqtë me dy gola në pjesën e dytë. Lille, në këtë mënyrë, mbetet në vendin e parë me 3 pikë më shumë sesa kampionët në fuqi.