Furnizmi me ujë, reforma nuk përmirësoi situatën për qytetarët

Uji i pijshëm u bë refren edhe në këtë fushatë elektorale. Pak ditë më parë, kryeministri Edi Rama premtoi furnizim pa ndërprerje ditë e natë në të gjitha qendrat urbane, nëse fiton një mandat të tretë.

Një premtim që përsëritet rregullisht në tri dekadat e fundit dhe që ende nuk ka marrë zgjidhje nga asnjë qeveri. Në vitin 2017, Edi Rama deklaroi nisjen e reformës së ujit. Qëllimi ishte që të ndalonte historia e mospagimit të faturës së ujit, shoqëritë e ujësjellës-kanalizimeve duhet të përmirësonin të gjithë indikatorët, ndryshe nuk do të subvencionoheshin nga shteti.

Por 4 vite më pas, sipas të dhënave të Entit Rregullator të Ujit, problemet jo vetëm që nuk u zgjidhën, por në shumë raste u përkeqësuan. Kështu, sot rezulton se vetëm 75.8% e territorit ka ujë të pijshëm, nga 81% që ishte ky tregues në vitin 2013.

Por sa orë kemi ujë në çezmat tona? Po sipas të dhënave Entit Rregullator të Ujit, në 7 vite furnizimi me ujë është përmirësuar me vetëm dy orë. Pra, nga 11.5 orë ujë në ditë në vitin 2013 në rreth 13.8 orë ujë në ditë në vitin 2020. Kjo është një shifër mesatare, pasi ka zona që furnizohen shumë më pak apo edhe të tjera që nuk kanë ujë. Ashtu siç ka edhe zona që kanë një furnizim të mirë.

Një tjetër tregues i rëndësishëm që tregon situatën në sektorin e ujit është uji pa të ardhura, e thënë ndryshe uji që hidhet në rrjet dhe humbet apo vidhet, pasi nuk arkëtohet. Ky tregues është përmirësuar lehtë nga 68.1% në 2013, në 65.1%. E thënë ndryshe, pas 7 vitesh në pushtet, 65% e ujit që hidhet në rrjet humbet dhe vetëm 35% arkëtohet.

Niveli i arkëtimeve të ujit të pijshëm është gjithashtu i dobët, me një përmirësim shumë të vogël.

Ajo që bie në sy nga të gjitha të dhënat, është një hap pas në performancën e sektorit të ujit përgjatë dy viteve të fundit. Shtuar me gjendjen e rënduar të financave të shoqërive të ujësjellësit dhe të vetë bashkive, duket që premtimi për 24 orë ujë të duket i paarritshëm në katërvjeçarin e ardhshëm, cilado forcë të shpallet fituese e zgjedhjeve.