Qeveria ka miratuar pagesën e 10 milionë dollarëve për blerjen e vaksinës kineze, me të cilën ka nisur prej pak ditësh edhe procesi i vaksinimit masiv të popullatës.
Përmes një akti normativ në buxhetin e shtetit, vendoset t’i transferohen fondit rezervë 1 miliard lekë, duke ia hequr programit për studime dhe projektime.
Në dokumentin që hyn në fuqi menjëherë dhe miratohet më pas nga Parlamenti zbulohet gjithashtu se ka qenë një kompani turke barnash që ka shprehur interesin për të furnizuar vendin me vaksinën kineze.
Institucioni që do t’i bëjë pagesën distributorit turk, do të jetë Instituti i Shëndetit Publik.
Ky është ndryshimi i dytë që i bëhet buxhetit të shtetit këtë vit me akt normativ, pas rishikimit në fillim të shkurtit për të përballuar koston e zgjedhjeve.