“Ky virus nuk njeh kufij”, BE disburson 90 milionë euro për Shqipërinë

Ky virus nuk njeh kufij” BE disburson 90 milionë euro për Shqipërinë 1100x620

Komisioni Europian njoftoi se ka disbursuar 90 milionë euro për Shqipërinë në kuadër të programit të ndihmës makro-financiare për të luftuar pandeminë e koronavirusit.

Sipas njoftimit të KE, Shqipëria është vendi i tetë që merr ndihmë financiare, nga paketa 3 miliardë euro e miratuar për të ndihmuar dhjetë shtete partnere dhe kandidate për t’u bërë pjesë e BE. Kjo është vetëm gjysma e shumës të cilën BE është zotuar se do të japë për Shqipërinë, ose 180 milionë euro.

“Ky disbursim do të kontribuojë për të përballuar pasojat e rënda negative socio-ekonomike të pandemisë së koronavirusit në Shqipëri. Ky virus nuk njeh kufij. BE i qëndron në krah Shqipërisë dhe qytetarëve të saj në këto kohë të vështira”, thuhet në njoftimin e KE. “Ky program është një dëshmi konkrete e solidaritetit të BE me Shqipërinë dhe qytetarët e saj në një kohë të paprecendetë krize”.