Dhuna skandaloze te moshat, disiplina dënon 9 lojtarë, 68 javë pezullime në total

disiplina 1100x620

Ngjarjet skandaloze të dhunës në kampionatin e 19-vjeçarëve janë shoqëruar me dënime të ashpra nga Komisioni i Disiplinës dhe Etikës. Nëntë futbollistë të pranishëm në ndeshjen Football Republic-Teuta, e vlefshme për Kategorinë Superiore të të rinjve, u pezulluan për një total prej 68 javësh nga kampionati.

Natyrisht, ekipi që e ka pësuar më tepër ishte Football Republic, shtatë futbollistë të së cilës u pezulluan me nga tetë javë secili. Gjithashtu, si organizatore e ndeshjes, kjo skuadër humbi ndeshjen në tavolinë me rezultatin 3-0, iu hoqën 20 pikë nga klasifikimi si edhe detyrohet që zhvillimin e ndeshjeve të mbetura në kampionatin e 19-vjeçarëve ti zhvillojë në fushë asnjëanëse dhe pa praninë e spektatorëve.

Disiplina dënoi edhe dy futbollistë të Teutës, të cilët u pezulluan me nga gjashtë javë secili. Sherri i nisur në fundin e ndeshjes, pas debatit ndërmjet një sulmuesi të skuadrës vendase dhe portierit të Teutës, u shndërrua shumë shpejt në dhunë masive në fushë.

Pamjet skandaloze tregojnë se pas përplasjeve mes lojtarëve, në fushë hynë edhe prindërit dhe tifozët, duke regjistruar një prej ngjarjeve më të rënda të dhunës në vitet e fundit.