Çfarë duhet të kuptojmë pas ngjarjes së Rinasit?

Ekonomisti Rezart Prifti, i ftuar në studion e “Ditari” në A2, komentoi ngërçin e krijuar në aeroportin “Nënë Tereza”.

Sipas tij, kontrollorët “nga ana etike nuk mund ta bënin këtë që bënë, por nga ana ligjore e kanë të fituar betejën”. Ekonomisti shtoi se palët e krijuara, ata që shajnë kontrollorët dhe ata që shajnë shtetin, nuk kanë të drejtë as njëra, as tjetra.

“Janë bërë dy palë: njëra shan kontrollorët; tjetra shan shtetin. Të dyja këto palë nuk japin argument, por njëra thotë “pse e ke rrogën kaq”, tjetra thotë “pse ke shpenzuar kaq”. E gjitha kjo është rezultante e paligjshmërisë, mungesës së meritokracisë, mungesës së sistemeve dhe mungesës e drejtësisë. Unë them që asnjë nga palët nuk ka të drejtë. Shteti nuk ka të drejtë sepse i ka bërë të gjitha emërimet në mënyrë korruptive. Pastaj, nëse akuzon disa njerëz se po bëjnë puç ndaj shtetit, ti je një shtet që i ke lënë shëndetësinë Turqisë, kufirin Turqisë, arsimin Turqisë, kontrollorët Turqisë dhe vaksinat Turqisë. Shteti po e bën vetë puçin e shtetit
Sa i përket punonjësve, kanë të drejtë për kontratën, por a janë futur me meritë në atë punë? Të drejtën e tyre për përgjysmimin e rrogës ta gjejnë në gjykatë. Dhe mendoj se kanë të drejtë me rregullat tona që kemi. Nga ana etike nuk mund ta bënin këtë që bënë, por nga ana ligjore këta e kanë të fituar betejën”, shpjegoi Prifti.