Apeli i presidentit Meta: Të rinumërohet çdo votë, ankimimi dhe kontestimi nuk ka filluar

Presidenti Ilir Meta u ka bërë thirrje të gjitha forcave politike që të përqendrohen te procesi zgjedhor, te numërimi dhe rinumërimi i çdo vote të hedhur në kuti dhe të mos merren me analizën e zgjedhjeve. Në një konferencë për shtyp, kreu i shtetit tha se në këto momente është i rëndësishëm administrimi i procesit zgjedhor me transparencë.

“Mos u çorientoni nga procesi i zgjedhjeve, ka përfunduar dita e votimit, po rezultati vazhdon dhe i ka të gjithë mundësitë që të jetë vetëm rezultat paraprak, se procesi i numërimit nuk ka mbaruar ende, ankimimi dhe kontestimi nuk ka nisur ende, kjo gjë nuk ndodh pa u shpallur rezultati i zgjedhjeve. Forcat politike të mos merren me analizën e zgjedhjeve, pasi ato nuk kanë përfunduar, por t’i shërbejnë mbarëvajtjes së procesit në respekt të çdo vote të qytetarëve dhe të gjithë të jenë në gatishmëri të këtij procesi. I rëndësishëm është administrimi me qetësi e transparencë maksimale. Tani kutitë janë të hapura me kod. Komisionerë, numërues e vëzhgues tani të përqendrohen në këtë çështje. Që një qytetar të shkojë të votojë dhe ajo të mund t’i dalë e pavlefshme për shkak të marifeteve dhe kalkulimeve është e pafalshme dhe nuk mund të ndodhë më”.

Meta theksoi se është shumë e lehtë për të bërë ekspertizën e fletëve të pavlefshme që, sipas tij, janë shumë dhe lëvizin shumë mandate.

“Faleminderit qytetarëve që iu përgjigjën thirrjes së presidentit dhe morën pjesë në zgjedhje. Pjesëmarrja reale është 74% e qytetarëve që janë rezidentë. Mohim i paprecedentë i emigrantëve, cenim i të drejtës kushtetuese, qytetarët e prekur nga Covid që nuk ushtruan të drejtën e votës dhe arsye të tjera. Të mos harrojmë që në këto zgjedhje kemi një numër të paprecedentë të fletëve të pavlefshme dhe kushdo ka të drejtë të dyshojë, janë mbi 5%, prandaj duhet me shumë përgjegjshmëri të mos preket asnjë kuti votimi, asnjë fletë votimi, të numërohet dhe rinumërohet gjithçka se pamjet filmike janë atje dhe është shumë e lehtë për të bërë ekspertizën. U bëj thirrje të gjithë forcave politike të përqendrohen për të mos cenuar më tej integritetin e këtij procesi dhe të rinumërojnë çdo votë të e hedhur në kuti. Çdo krim zgjedhor e rëndon pozitën e tyre për të mbuluar ato që kanë ndodhur deri më tani”.