Paratë e pista në ndërtim, Soko: Çmimet e apartamenteve do bien, bankat do mbushen me kolaterale

Eksperti i ekonomisë Pano Soko deklaroi në A2 Business se paratë e pista sjellin flluska ekonomike.

Si shembull konkret Soko sjell ndërtimin, duke thënë se shumë shpejt çmimet do të bien dhe bankat do të mbushen me kolaterale.

“Është një mekanizëm i ndërtuar për të përfituar një grup personash, jo për të përfituar ekonomia. Nuk mund të përfitojë ekonomia nga paraja e pisët. Paraja e pisët krijon flluska ekonomike. Pra është financim me shumë vlera të panevojshme në një sektor të ekonomisë. Një sektor i ekonomisë është si një lule që ka nevojë për ujë po jo shumë ujë se mbytet lulja.

E njëjta gjë po ndodh me ndërtimin. Po financohet, ulatrfinancohet sot po krijohet një flluksë në ndërtim dhe çmimet janë të larta. Në momentin që flluska do plasë aty do kemi probleme sepse do shkojnë njerëzit do shkojnë në banka.

Në momentin që mbaron furnizmi me para të pista në ndërtim, çmimet që sot janë nga 2000-2500 euro do bien. Sepse nuk do ketë më nevojë dhe e dyta do të jetë ai që quhet paniku. Këto apartamente që blehen sot nuk janë për të jetuar njerëz, por për të parkuar para. Pra ai blen një apartament sot që nesër të arkëtojë disa para dhe ti ketë të pastra në llogari bankare.

Të gjithë këta do ti shesin sepse do jetë sensi panikut. Do bien çmimet dhe të gjithë do shesin apartamente. Problemi nuk do të jenë këta që pastrojnë para por një pjesë e mirë e qytetarëve kanë marrë kredi në bankë e kanë marrë për atë çmimin e lartë. Dhe kur të bjerë vlera e apartamenteve ato kredi do kthehen në kolaterale. Praktikisht nëse ti ke marrë 100 mijë euro kredi për shtëpi dhe ajo shtëpi sot vlen 30 mijë euro, më mirë sesa ti kthesh 100 mijë eurot, i kthen shtëpinë. Do mbushen të gjitha bankat me kolaterale sepse nuk do të kthehet kredia sepse nuk ka sens ekonomik.”, shprehet Pano Soko. (A2 Televizion)