Në Evropian do të marrin pjesë disa nga futbollistët më të mirë të botës. Momenti i mirë që po kalon futbolli evropian (ka fituar çdo Botëror që nga viti 2006) bën që faza finale e “Euro 2020” të jetë pothuajse si një Botëror.
Gati çdo përfaqësuese ka një yll në ekip dhe në galerinë e mësipërme do t’ju njohim me ata që shkëlqejnë më shumë.
Neuer (Gjermani) - Pas kritikave dhe kërkesave që t’ia linte vendin Ter Stegenit, portieri i Bayern rifitoi formën sezonet e fundit, duke bërë paraqitje të shkëlqyera. Sot askush nuk e vë në diskutim dhe konsiderohet portieri më i mirë në botë. Alaba (Austri) - Lojtari i ri i Real Madrid është një nga mbrojtësit më të mirë të dekadës së fundit. Me Bayern ka luajtur mbrojtës krahu, mbrojtës qendre, por edhe mesfushor. Në mesfushë i pëlqen të luajë më shumë dhe Austria e përdor gjithmonë aty. De Bruyne (Belgjikë) - Sapo përfundoi një tjetër sezon të shkëlqyer me Manchester City. Pason dhe godet shkëlqyeshëm. Mund të luajë kudo në mesfushë. Modric (Kroaci) - Duket sikur koha nuk kalon për mesfushorin e Real Madrid. Përveçse zotëron një teknikë të shkëlqyer, ndihmon edhe në mbrojtje. Një nga mesfushorët më të mirë në histori. Benzema (Francë) - Pas 6 vitesh mungesë te Franca për shkak të skandalit seksual me Valbuena, niveli i tij gjatë këtyre viteve bëri që Didier Deschamps ta kthente në përfaqësuese. Mbappé (Francë) - Edhe pse në moshë shumë të re, ka treguar veten në Botëror dhe Champions. Ka gjithçka për të dominuar futbollin në 10 vitet e ardhshme. Bale (Uells) - Rilindi me Tottenham këtë sezon. Legjenda e futbollit uellsian ka hyrë në histori me performancat e tij fantastike në Euro 2016 dhe me Champions-at e fituar me Realin. Kane (Angli) - Një qendërsulmues i shkëlqyer. Jo vetëm shënon, por edhe jep pasime për gol. Lewandowski (Poloni) - Një “vrasës” që ka tmerruar Evropën me shifrat e tij në vitet e fundit. Meritonte Topin e Artë sezonin e kaluar, por “France Football” vendosi që mos ta akordonte atë sezon, për shkak të pandemisë. Rúben Dias (Portugali) - U shpall lojtari më i mirë i Premier League, pas sezonit fantastik me Manchester City. Një garanci në mbrojtje për Cristianon me shokë. Cristiano (Portugali) - Edhe në një sezon për t’u harruar me Juventusin, doli golashënuesi më i mirë i Serisë A. Nuk është më i freskët, por uria e tij për të thyer rekorde e bën të frikshëm ende.