Ashtu si në Shqipëri, edhe në vendet e rajonit po përjetohet vala e të nxehtit afrikan. Në Kosovë, temperaturat kanë shkuar mbi 37 gradë celsius, ndërsa grimcat e pluhurit saharian kanë përkeqësuar cilësinë e ajrit.
Autoritetet në Prishtinë kërkuan që qytetarët të mos ekspozohen ndaj rrezeve direkte të diellit, të paktën nga ora 09:00 e mëngjesit deri në 17:00 pasdite.
E njëjta situatë edhe në Maqedoninë e Veriut, ku është aktivizuar alarmi i nivelit portokalli. Autoritetet kërkuan që të lihen pushim nga puna grupet më të ndjeshme, përfshirë gratë shtatzëna, të sëmurët kronikë dhe personat mbi 60 vjeç.
Në Serbi, i nxehti afrikan theu rekordin e 100 viteve më parë për temperaturën më të lartë, teksa termometri shënoi mbi 40 gradë celsius. Edhe në këtë shtet, këshilla për qytetarët ishte e njëjtë, që të shmanget ekspozimi direkt në diell.
Në Greqi temperaturat në 3 ditët e fundit kanë variuar nga 38 deri në 42 gradë celsius, teksa cilësia e ajrit është përkeqësuar nga grimcat e pluhurit saharian.
Edhe në Itali vijojnë temperaturat ekstreme të larta, ndërsa parashikohen edhe disa stuhi në disa rajone, që do të sjellin pak freski për qytetarët.