Një aksident tragjik gjatë procesit të punës, i ka marrë jetën një të riu 20-vjeçar në qytetin e Durrësit. Ngjarja ka ndodhur në një gomisteri në lagjen 14 në zonën e ish-Kënetës.
Sipas të dhënave policore i riu Rafel Tafaj ishte duke riparuar gomën e një kamioni, kur goma ka shpërthyer papritur dhe forca e goditjes i ka shkaktuar edhe vdekjen të riut. Goma si pasojë e shpërthimit ka dalë fare nga disku, duke e goditur fort 20-vjeçarin.
Policia e Durrësit ka shkuar në vendngjarje, ndërsa një grup hetimor ka nisur verifikimin e kushteve të sigurisë në punë dhe zbardhjen e plote të rrethanave të këtij aksidenti fatal.