Mbi 4 milionë viktima në të gjithë botën nga Covid-19

Më shumë se 4 milionë njerëz në të gjithë botën kanë vdekur nga Covid-19, sipas të dhënave nga Universiteti Johns Hopkins.

Shtetet e Bashkuara të Amerikës kanë numrin më të lartë të viktimave me 606 000 dhe përbëjnë 15% të totalit global, të ndjekura nga Brazili dhe India.

Kjo u njoftua të mërkurën, ndërsa rastet e reja dhe vdekjet po bien në SHBA dhe Evropë, ku një numër i konsiderueshëm i banorëve janë vaksinuar. Por disa vende në zhvillim, si Indonezia, ende po përballen me shpërthime të mëdha, ndërsa autoritetet përpiqen të sigurojnë mjaft vaksina për të mbrojtur qytetarët.

Varianti Delta, një lloj më i transmetueshëm dhe ndoshta më i rrezikshëm i koronavirusit, po kontribuon në rritjen e rasteve në disa vende dhe rajone. Në SHBA, varianti Delta tani përbën më shumë se gjysmën e të gjithë infeksioneve të reja, sipas vlerësimeve nga Qendrat Amerikane për Kontrollin dhe Parandalimin e Sëmundjeve (CDC).

Mesatarisht 7900 vdekje Covid-19 u raportuan çdo ditë gjatë javës së kaluar, sipas JHU. Kjo është 46% më pak se kulmi global me më shumë se 14 700 vdekje ditore në janar, por 57% më e lartë se ritmi i rreth 5000 vdekjeve ditore nga kjo kohë e vitit të kaluar.

Numri global i viktimave kaloi 1 milion, më 18 shtator 2020, 191 ditë pasi Organizata Botërore e Shëndetësisë shpalli shpërthimin e koronavirusit të ri, një pandemi globale. U deshën 115 ditë që numri i vdekjeve globale të kapte 2 milionë, 88 ditë të tjera për të kapërcyer 3 milionë dhe 89 ditë të tjera për të arritur 4 milionë.

Duke pasur parasysh vështirësinë për të ndjekur me saktësi përhapjen e virusit, veçanërisht në botën në zhvillim, shumë ekspertë besojnë se numri i vdekjeve globale ka të ngjarë të jetë më i lartë se numri i raportuar zyrtarisht.

Në një deklaratë të enjten, Sekretari i Përgjithshëm i Kombeve të Bashkuara, Antonio Guterres, paralajmëroi shfaqjen e varianteve më të transmetueshme, më vdekjeprurëse që ka më shumë të ngjarë të dëmtojnë efektivitetin e vaksinave aktuale nëse lejohet që virusi të vazhdojë të përhapet.

“Vaksinat ofrojnë një rreze shprese – por pjesa më e madhe e botës është ende në hije. Virusi po tejkalon shpërndarjen e vaksinave”, tha ai, duke kërkuar një plan global për të rritur prodhimin e vaksinave, për të siguruar shpërndarje të drejtë dhe për të trajtuar hezitimin e vaksinave.

“Për të realizuar këtë plan, unë po bëj thirrje për një Task Forcë Emergjente që bashkon të gjitha vendet me kapacitete të prodhimit të vaksinave, Organizatën Botërore të Shëndetësisë, aleancën globale të vaksinave GAVI dhe institucionet financiare ndërkombëtare të merren me kompanitë përkatëse farmaceutike dhe prodhuesit, dhe aktorë të tjerë kryesorë”, tha ai.