Bullgarët janë thirrur në votime për zgjedhjet parlamentare këtë të diel, për të vendosur se kush do ta formojë qeverinë e re. Garë e fortë mes partive opozitare të protestave dhe asaj në pushtet të Bojko Borisov që dominon prej një dekade politikën e këtij shteti. Zgjedhjet në Bullgari janë të dytat në 3 muaj, pasi votimi i prillit dështoi të prodhonte një fitues të qartë që do të formonte qeverinë e re. Kjo solli përçarje të thellë në shtetin ballkanik si dhe zemërim për qeverisjen e kryeministrit jetëgjatë, Bojko Borisov.
Partia e tij GERB shfaqet në rezultat të ngushtë me partinë e sapoformuar të prezantuesit televiziv, Slavi Trifonov.
Sondazhet i nxjerrin ata me 20 deri në 22 përqind të votave secila.
Zgjedhjet kanë rëndësi të veçantë jo vetëm për këtë shtet, por edhe për Europën dhe rajonin. Maqedonia e Veriut është në pritje të qeverisë së re për të zbllokuar ngërçin në negociatat e anëtarësimit në BE.