Lojërat Olimpike të Tokios ende nuk kanë hapur dyert zyrtarisht, me ceremoninë që pritet ditën e premte, por shumë disiplina sportive për efekt kohe kanë filluar të konkurrojnë, duke dhënë rezultatet e para.
Nuk mungojnë surprizat. Më e madhja vjen sigurisht nga futbolli për femra, aty ku Shtetet e Bashkuara, kampionia e botës në fuqi dhe padyshim superfuqia kryesore në këtë sport për sa i përket femrave, u mund me rezultatin e thellë 3-0 nga Suedia, në grupin G të turneut olimpik.
Për Suedinë ishte protagoniste edhe mesfushorja e talentuar shqiptare, me origjinë nga Kosova, Kosovare Asllani. Skandinavet dominuan lojën, duke i dhënë një leksion amerikaneve favorite, që në ketë mënyrë thyejnë rekordin e 44 ndeshjeve pa humbje.
Para ndeshjes ekipet u ulën në gjunjë kundër racizmit, në një ritual që tashmë do të përsëritet edhe në Tokio.