Chelsea është i vendosur për të kthyer Romelu Lukakun në Premier League, me çdo kusht. Blutë e Londrës kanë bërë dy oferta zyrtare deri më tani, për një shumë që arrin deri në 110 milionë euro duke përfshirë edhe emra si ai i Markos Alonsos në traktativa, por në të dyja rastet janë përballur me një “jo” nga ana e zikaltërve.
Kampionët e Italisë po përpiqen të mos humbasin të tjera pjesë nga skuadra që fitoi titullin, por duket e pamundur me insistimin e anglezëve që tashmë ofrojnë plot 130 milionë euro.
Në këtë pikë, diferencën mund ta bëjë vetëm dëshira e sulmuesit belg dhe Lukaku duket i hapur për rikthimin në ishull, sipas asaj që raportojnë mediat në Itali.
Nëse ky operacion finalizohet, atëherë kalimi i belgut te Chelsea do të ishte blerja më e bujshme e klubit të Abramovic, njëkohësisht shitja më e shtrenjtë në historinë e klubit milanez. Blutë i sigurojnë bomberit 28-vjeçar 12 milionë euro plus bonuse në një sezon, 4.5 milionë më shumë nga ajo që Lukaku përfiton në Itali.
Inter po përpiqet të rezistojë, por nëse sulmuesi i tyre bindet për t'u kthyer në Angli, atëherë zikaltrit do të hapin rrugë dhe do të duhet të mendojnë për zëvendësuesin e belgut. Duvan Zapata apo Joaquin Correa janë emrat e parë në listën e Simone Inzaghit që mund të marrin përgjegjësinë e golave për kampionët e Italisë.