Në ndeshjen e parë pa Romelu Lukaku, Interi i Simeone Inzaghi dhuroi një paraqitje të mirë, duke fituar 2-0 miqësoren me Parmën. Testi në Tardini u karakterizua nga kontestimi i tifozëve ultras kundër pronarëve Suning dhe Steven Zhang për shitjen e yllit të sulmit.
“Zhang, nëse do të shpëtosh Interin, largohu” dhe “Zhang, koha jote mbaroi” ishin parullat e shfaqura nga mbështetësit zikaltër.
Gjithashtu, nuk munguan thirrjet “largohu se paratë t'i japim ne”, me tifozët në tribuna që mbanin në duar kartëmonedha të ndryshme. Pas dështimit në blerjen e kartonit të Hakimit, për shkak të problemeve ekonomike, shitja e Lukakut ishte goditja më e fortë për kampionët e Italisë. Ata pranuan ofertën e Chelsea, me vlerë 115 milionë euro për sulmuesin belg, që do të firmosë kontratë me pagë 12 milionë euro në sezon.
Tifozët shfaqën të gjithë mbështetjen për trajnerin Simeone Inzaghi, skuadrën dhe zyrtarët e klubit, që po punojnë për ta mbajtur ekipin në nivele të larta.
Zikaltrit kanë marrëveshje me Edin Dzeko, ndërsa synojnë të kompletojnë repartin sulmues, ku qarkullojnë emrat e Duvan Zapata dhe Joachin Correa.
Kolumbiani kushton 35 milionë euro, ndërsa argjentinasi 30 milionë, por Zapata i Atalantës është i preferuari i stafit teknik, pasi ngjason në aspektin fizik dhe atë teknik me Lukakun.