Situata e rënduar me pandeminë në Kosovë, infektologu Tolaj: Jemi në kushtet e mbylljes, qeveria reagoi me vonesë

Mjeku infektolog në universitetin e Mjekësisë në Prishtinë, Ilir Tolaj hodhi akuza ndaj qeverisë për situatën e rëndë të krijuar me koronavirusin në Kosovë me veprimin e saj të ngadaltë dhe heqjen e masave për shumë aktivitete.

Ai tha se lejimi i dasmave, lokaleve të natës dhe disa aktiviteteve të tjera çoi në rritjen e shifrave të infektimeve. Sipas mjekut Tolaj, Kosova është në situatën kur duhet mbyllur sërish.

“Lirimi i masave në përmasat që ishin në Kosovë është një prej shkaqeve se përse kemi një situatë të tillë më valën e katërt të pandemisë dhe përhapja e Deltës e ka bërë të vetën. Qeveria veproi në mënyrë të ngathtë të vonuar edhe kur rastet nisën të shtohen, lejoi lokalet e natës dhe kafeteritë me orar të gjatë.

Asnjë nga këto veprimtari nuk u shoqërua me masa minimale antiCovid. Në Kosovë duke lejuar punën e disa segmenteve ne tashmë po përballemi me pasoja dhe vuajtje. Duke synuar të lejojmë një jetë të lirë ekonomike jemi në situatën të mbyllemi në tërësi”, u shpreh Tolaj në A2.