KPK vendos më 3 shtator për prokurorin e Sarandës Sali Hasa: Deklarim i pasaktë dhe i pajustifikuar i pasurisë

Komisioni i Pavarur i Kualifikimit do të marrë vendim më 3 shtator për të mbajtur në detyrë, apo jo, Sali Hasën, prokurorin e pezulluar të Sarandës, i cili ndodhet në burg pasi akuzohet nga SPAK për korrupsion. Hasa nuk u paraqit në seancë dhe ka bërë me dije se nuk do të paraqitet, si dhe nuk ka dërguar as avokat.

Gjatë seancës, relatori i KPK tha se Hasa ka deklarim të pasaktë dhe të pajustifikuar të pasurisë.

Hasa rezulton të ketë pasur një shtëpi në Kavajë, e cila është shitur në vitin 1998. Gjithashtu, truall 500 m2 në Kavajë dhe 130 m2 karabina në vlerën 2 milionë lekë, por ka mungesë në justifikimin e ndërtimit të saj.

Subjekti ka deklaruar se sipërfaqja është blerë 400 mijë lekë në vitin 1998. Për këtë pasuri rezultojnë dy kontrata blerjeje me vlera të ndryshme 400 dhe 500 mijë. Në 2004 pasuria arë është shitur, por jo pasuria karabina 130m2. Nuk u provua ndërtimi i kryer pa leje dhe vlera e saktë e ndërtimit.

KPK konstaton mungesë dokumentacioni për ndërtimin e objektit, që sipas eksperteve ka vlerë 3,6 milionë lekë. Është e dyshimtë mospërfshirja e godinës në kontratën e shitjes së pasurisë në vitin 2004. Subjekti ka pasur mungesë burimesh financiare për këtë pasuri.

Apartament 163 m2 në Durrës, për të cilin ka mungesë të burimeve financiare për blerjen e tij me një çmim prej 50 mijë dollarësh, në Durrës në vitin 2001. Mbetet e paqartë periudha e likuidimit të kësaj shume.

Subjekti ka nisur punën si prokuror në vitin 2004. Në vitin 2005 ai ka deklaruar shtëpi banimi 153 m2 në Durrës. Subjekti ka bërë deklarime kontradiktore nëpër të gjitha deklaratat. Në deklaratën e tij të parë në ILDKP, subjekti nuk ka deklaruar detyrimet për blerjen e apartamentit.

Hasa ka një apartament me sipërfaqe 90 m2 në Sarandë, i blerë në vitin 2010, i padeklaruar në ILDKPI në vlerën 3,9 milionë lekë. Deklarim i rremë për një pagesë kësti në vitin 2014, pagesë që ishte bërë më herët. Dyshohet për çmim më të ulët se vlera e tregut.

Një person u ka dhuruar fëmijëve të tij 1000 m2 truall në Porto Palermo në vitin 2014. Nuk u konstatua konflikt interesi, por mbetet i dyshimtë arsyeja e dhurimit (pasi dhuruesi nuk është rreth familjar). Ka dy kontrata dhe dyshohet se sipërfaqja është 2 mijë m2.

Nga seanca në KPK për Sali Hasën

Hasa u arrestua më 19 qershor të këtij viti, me vendim të Gjykatës së Posaçme. Ai akuzohet për veprën penale të korrupsionit pasiv. Në pranga ka përfunduar edhe oficeri i Policisë Gjyqësore Napolon Hodaj, i akuzuar për ushtrim të ndikimit të paligjshëm ndaj personave që ushtrojnë funksione publike.

Shkak për arrestimin e prokurorit është bërë dyshimi se ka pushuar akuzën e plagosjes për Emiljano Miranin, pasi ka marrë ryshfet nga motra e tij, Elsona Papa. Ndërsa për oficerin e Policisë Gjyqësore, Napolon Hodaj, dyshohet se në bashkëpunim me ish- ekspertin mjeko-ligjor, Hysen Korenica kanë mundësuar shpëtimin nga akuzat të një personi të akuzuar për “vjedhje me dhunë” dhe “plagosje”.

Së bashku me këta zyrtarë, janë vënë në pranga edhe katër persona të tjerë mes të cilëve një arbitër i ndeshjeve sportive si dhe një zyrtar i klubit sportiv të Përmetit, të akuzuar për paracaktim të rezultateve sportive si dhe ushtrim të ndikimit të paligjshëm. Qerim Ruci dhe Bledar Hajredini dyshohet se kanë paracaktuar rezultatin për ndeshjen Slenica-Permeti. Gjithashtu janë nën hetim në gjende të lirë edhe një ekspert mjeko-ligjor si dhe një shtetase.

Çështjet janë të pavarura nga njëra-tjetra, por janë zbuluar nga përgjimet e hetimit të parë. Personat e lartpërmendur janë arrestuar në kuadër të një hetimi të nisur në vitin 2020 për  veprat penale të “trafikimit të narkotikëve”, kryer në bashkëpunim, në kuadër të grupit të strukturuar kriminal.

  • LAJMI I FUNDIT | Apeli lë në fuqi dënimin me 2 vite burg për Adriatik Llallën
  • LAJMI I FUNDIT | Ish-kryeprokurori është shpallur fajtor për fshehje dhe mosdeklarim të pasurisë