Presidentja e Kosovës, Vjosa Osmani, ka zhvilluar një bisedë telefonike me Nënpresidenten e Shteteve të Bashkuara, Kamala Harris, ku e ka falenderuar për mbështetjen e vazhdueshme dhe në veçanti për dhurimin e vaksinave kundër COVID-19.
“Një veprim i tillë e ka vulosur edhe njëherë miqësinë e palëkundshme në mes të dy vendeve tona, si dhe është dëshmia më e pastër e përkrahjes së parreshtur të SHBA-ve për vendin tonë”, thuhet në njoftimin e Presidencës së Kosovës.
Zyra e presidentes së Kosovës ndërkaq citon Nënpresidenten e Shteteve të Bashkuara, Kamala Harris të ketë thënë se “SHBA-të janë thellësisht mirënjohëse ndaj Kosovës për bashkëpunimin e ngushtë dhe gatishmërinë e bujarinë e treguar për mikpritjen e mijëra qytetarëve afganë si dhe lidhjen personale dhe të thellë ndërmjet administratës Biden dhe popullit të Kosovës”.