Të mbetur pas në kohë, një komunitet që ende jeton si në vitet ‘50

Banesa me një peizazh baritor, burra me kapele kashte duke hipur në karroca me kuaj, mund të duken si elemente të kohëve të kaluara në Midwest-in amerikan. Në fakt, ky stil jetese ende vazhdon të ruhet në Belize, në Amerikën Qendrore, ku një komunitet i mbyllur protestant prej 12 000 vetash, shmangin teknologjinë moderne dhe në disa raste edhe energjinë elektrike.

Anëtarët e këtij sektit nisën të lëvizin nga Evropa që nga shekulli i 16-të, në kërkim të tokave bujqësore të izoluara, për t’i shpëtuar persekutimit. Në fund të viteve 1950, një grup prej mbi 3000 menonitësh kanadezë emigruan në Belize. Ardhja e tyre pasoi me një marrëveshje me qeverinë vendase, e cila u ofroi atyre tokë, liri fetare dhe përjashtim nga taksa të caktuara. Në këmbim, vendi ka shijuar frytet e bujqësisë së tyre. Sot, menonitët dominojnë tregjet e brendshme të shpendëve dhe qumështit në Belize, pavarësisht se përfaqësojnë më pak se 4% të popullsisë.

Të lejuar për të drejtuar shkollat e tyre, menonitët e Belizës kanë shkallë të ulët të arsimimit në krahasim me grupet e tjera etnike të vendit, me vetëm 5% që përfundojnë arsimin e mesëm. Ata kryesisht mbështeten në bujqësinë tregtare, brenda komunitetit të tyre.

“Bota e tyre kryqëzohet tani më shumë me botën moderne sesa më parë. Ka disa menonitë që punojnë së bashku me njerëzit e tjerë në Belize, kështu që ata janë të vetëdijshëm për botën e jashtme dhe atë që po ndodh”, tha për CNN, fotografi Jake Michaels, i cili u bë pjesë e një projekti për të zbuluar më shumë për këtë komunitet, përmes imazheve. Fotografitë e shumta fiksojnë një shoqëri të mbetur pas në kohë, që reflektohet në veshje, stil jetese, e gjithçka që të kthen pas në vitet 1950.