Shqipëria ka fituar 5-0 ndaj San Marinos, në një ndeshje të dominuar nga fillimi në fund.
Rey Manaj, në minutën e 32, përfitoi nga një pasim me kokë i Bares në zonë, për të kaluar në avantazh kuqezinjtë. Futbollisti i ri i Spezias e dërgoi topin në rrjetë edhe dy herë të tjera në pjesën e parë, por VAR-i i anuloi për pozicion jashtë loje.
Në pjesën e dytë, me aktivizimin e Roshit dhe Brojës në vend të Trashit dhe Bajramit, kuqezinjtë gjetën rrugën e rrjetës edhe 4 herë të tjera, me anë të Laçit (58’), Brojës (61’), Hysajt (68’) dhe Uzunit (80’).
Me këtë fitore, shoqëruar me barazimin 1-1 të Polonisë ndaj Anglisë, Shqipëria renditet tashmë në vendin e dytë të Grupit I, me 12 pikë në 6 ndeshje. Grupin e kryeson Anglia me 16 pikë, ndërkohë që në vendin e tretë renditet Polonia (11 pikë), e ndjekur nga Hungaria (10 pikë), ndërsa mbyllin renditjen Andorra (3 pikë) dhe San Marino (0 pikë).