Kryeministri kosovar Albin Kurti ka reaguar përmes një postimi në Facebook për ngjarjen në Zubin Potok, ku raportohet se është djegur ndërtesa  e Qendrës së  Regjistrimit të Automjeteve, ku dyshohet se janë përfshirë elementë serbë që nuk dakordësojnë me vendimin e reciprocitetit të targave që i detyron ato të marrin targa të përkohshme të Kosovës gjatë qëndrimit aty.  

Sipas Kurtit, “hetimet preliminare tregojnë që djegia e ndërtesës së Qendrës së Regjistrimit të Automjeteve në Zubin Potok nuk ishte aksidentale por e qëllimshme”. Kryeministri zbulon edhe se një ngjarje e përafërt ka ndodhur edhe në Zveçan, ku sipas tij “kanë hedhur dy bomba dore, po ashtu në ndërtesën e qendrës për regjistrimin e automjeteve, por ato fatmirësisht nuk kanë eksploduar”.

Për kreun e qeverisë kosovare “Individë ose grupe të cilave sundimi i ligjit dhe rendi e siguria publike ua rrezikon aktivitetin kriminal po e sulmojnë shtetin tonë dhe po e cenojnë paqen. Qartazi ata po i nxit e mbështet Serbia, përkatësisht regjimi autokrat atje. Fatkeqësisht, para syve të bashkësisë ndërkombëtare, Serbia po përdorë qytetarë të Kosovës për të provokuar konflikt serioz ndërkombëtar”.

Kurti i bëri apel shtetasve të Kosovës, “pavarësisht a janë serbë, shqiptarë, boshnjakë apo romë, që ta ruajnë qetësinë dhe të bashkëpunojnë me institucionet”.