Ironizon Patozi: U janë falur foltores. Nuk e kuptojnë që bëhet partia pastaj zgjidhet kryetari

Patozi 1100x620

“U janë falur të gjithë foltores, për të zgjedhur kryetarin, se nuk e kuptojnë që në një vend demokratik bëhet njëherë partia pastaj zgjidhet kryetari”. Kështu shprehet në rrjete sociale ish-nënkryetari i partisë Demokratike Astriti Patozi, duke ironizuar në këtë mënyrë situatën e brendshme në PD, një ditë pasi ish-kryeministri Sali Berisha pranoi të kandidojë për kreun e kësaj partie.

Postimi i Astrit Patozit:

PO ME ATË “LULIN” TJETËR SI DO T’IA BËJNË?

Përpiqem t’i kuptoj ata demokratë apo ish-demokratë të mërzitur, që janë ngazëllyer aq shumë dhe kanë nisur të ndjehen gjallë nga rikthimi në fushë i doktorit. Edhe adrenalinën apo motivimin e fortë, që prodhon ideja e hakmarrjes për shumicën e tyre, se më në fund po afrohet dita e shpagimit për “besëprerin” Lulzim Basha.

Por e zemë për një çast se do t’u plotësohet ëndrra, ndonëse nuk ka ndonjë shenjë që kryetari me letra i PD ta çojë nëpër mend të dorëzojë çelësat, edhe sikur takimet e Berishës t’i shkojnë në oborrin e selisë.

Puna është se çfarë do bëjnë me atë “Lulin” tjetër, që do vijë pasi ta heqin këtë “liderin e thyer” peng të Edi Ramës. Mbase do ta presin edhe nja 12 vjet të tjera, derisa të binden se ai nuk do ta tradhtojë kurrë doktorin.

Me sa duket, 31 vjet pluralizëm në Shqipëri nuk kanë mjaftuar për të mësuar se në një vend demokratik duhet të bësh një herë partinë dhe pastaj të zgjedhësh kryetarin. Këta duan të zgjedhin një herë kryetarin, që ai pastaj t’u rregullojë apo t’ua bëjë ndoshta nga e para partinë.

Dhe për shkak të këtij keqkuptimi i kanë rënë shkurt, u janë falur të gjithë foltores, njësoj si ata të pafatët në bashkëjetesë, që pasi i provojnë të gjitha, martohen prapë me gruan e parë.