Rama bashkëbisedim me demokratët, Patozi: Mbaj vendin tënd dhe mos u gëzo para kohe!

Përditësuar më: 9/1/2022, ora 13:52
patozi1 1280x720

Rama bashkëbisedim me demokratët, Patozi: Mbaj vendin tënd dhe mos u gëzo para kohe!

Përditësuar më: 9/1/2022, ora 13:52

Pas bashkëbisedimit të kryeministrit Rama me demokratët në Facebook, në lidhje me protestën e një dite më parë, ka reaguar edhe ish-kryetari i Bindjes Demokratike Astrit Patozi. Në një postim në Facebook ai këshillon kryeministrin të përmbahet dhe të mos t’u tregojë rrugën demokratëve, pasi nuk është Ajatollahu i shqiptarëve.

“Mbaj vendin tënd dhe mos u gëzo para kohe! Përmbahu, o komandant, edhe pse nuk është kaq e lehtë ta fshehësh gëzimin pas një dhurate, që duket sikur të vjen nga qielli, kur shikon live se si kacafyten mes vedi kundërshtarët e tu politikë.  Por mbaj vendin tënd, se nuk pret kush prej teje t’u tregosh rrugën demokratëve se çfarë duhet të bëjnë me partinë dhe të ardhmen e tyre. Sado të dëshpëruar dhe të pashpresë të ngjajnë sot, për shkak të papërgjegjshmërisë së atyre që i udhëhoqën në përleshjet e djeshme, ata nuk kanë nevojë për sugjerimet e tua. Madje nuk na shkon të japim këshilla, as ne të tjerëve, që kemi kaluar më shumë se gjysmën e jetës në atë parti, përsa kohë jemi ndarë me hir apo me pahir prej saj. Sepse ti nuk je Ajatollahu i shqiptarëve, edhe pse mund ta ëndërrosh shumë një gjë të tillë. Ndaj shiko punët e qeverisë tënde, shumicën e të cilave i ke katranosur, dhe mos merr përsipër të bësh edhe detyrat e opozitës”.

Patozi thekson se opozita do ta gjejë vetë drejtimin e saj dhe i tregon Ramës që të shohë qeverisjen e tij, e cila mund të fundoset pa patur nevojë për kundërshtarët.

“Ata do ta gjejnë vetë drejtimin e tyre, sepse opozita nuk mund të jetë asnjëherë vetëm një seli, një logo, një vulë, e aq më pak halli i vetëm një njeriu apo i familjes së tij. Ajo është mbi të gjitha frymë dhe nevojë e shoqërisë për të shpresuar tek ndryshimi dhe ajo do ta gjejë shumë shpejt, jo vetëm formulën e përfaqësimit, por edhe njerëzit e duhur për ta drejtuar. Ndaj kurseji leksionet për demokratët e zhgënjyer dhe hidhi një sy anijes së lodhur të qeverisë tënde, e cila fut ujë nga të gjitha anët. Aq sa mund të fundoset edhe pa pasur nevojë fare për topat e kundërshtarit”.