Kosova me doganë në Durrës, qeveria ratifikon marrëveshjen

Përditësuar më: 26/1/2022, ora 19:55

Kosova me doganë në Durrës, qeveria ratifikon marrëveshjen

Përditësuar më: 26/1/2022, ora 19:55

Qeveria ka miratuar projektligjin për lehtësimin e procedurave doganore mes Shqipërisë dhe Kosovës, që synon qarkullim më të lehtë të mallrave mes dy vendeve, me unifikimin e kontrolleve.

“Miratuam projektligjin për ratifikimin e marrëveshjes me Kosovën sa i përket zbatimit të lehtësirave  të ndërsjella reciproke në procedurat doganore, si dhe kontrollit të hyrjes dhe daljes së mallrave. Kjo marrëveshje është nënshkruar gjatë mbledhjes së përbashkët të dy qeverive në nëntor dhe tashmë marrëveshja shkon në parlament. Kjo marrëveshje do të lehtësojë tregtinë ndërmjet dy vendeve tona, duka njohur të gjitha licencat e të gjitha agjencive doganore që ndodhen në kufij, duke unifikuar kontrollet doganore të dy vendeve, duke ulur kohën e kontrollit doganor”, bëri të ditur ministrja e Financave dhe Ekonomisë, Delina Ibrahimaj.

Po ashtu, ministrja njoftoi edhe ratifikimin e marrëveshjes që parashikon çeljen e pikës doganore të Kosovës në portin e Durrësit.  

Pika doganore e Kosovës në Durrës është çelur dhe funksionon prej vitit 2019 duke lehtësuar kalimin e mallrave transit për në Kosovë, të cilat i nënshtrohen verifikimeve kur mbërrijnë në destinacion, duke shmangur vonesat në Durrës. Deri tani kjo pikë doganore nuk bënte zhdoganimin në Portin e Durrësit të mallit me destinacion Kosovën.