Parlamenti Evropian rekomandon t’i jepet Ukrainës statusi kandidat për në BE

Përditësuar më: 2/3/2022, ora 10:30
1 MARS REUTERS PARLAMENTI EUROPIAN SEANCA frame 28190 1280x720

Parlamenti Evropian rekomandon t’i jepet Ukrainës statusi kandidat për në BE

Përditësuar më: 2/3/2022, ora 10:30

Parlamenti Evropian miratoi të martën një rezolutë, që u bën thirrje institucioneve të Bashkimit Evropian të punojnë për t’i dhënë Ukrainës statusin e vendit kandidat për në BE.

Rezoluta, e cila kërkonte që BE-ja të vendoste sanksione më të ashpra ndaj Rusisë, u votua pro nga 637 deputetë të Parlamentit Evropian. Ajo dënoi në termat më të fortë të mundshëm pushtimin e paligjshëm të Rusisë në Ukrainë dhe kërkon që Kremlini t’i japë fund të gjitha aktiviteteve ushtarake në vend.

Anëtarët theksuan gjithashtu se sanksionet financiare të BE-së kundër Rusisë duhet të shkojnë më tej, duke deklaruar se “të gjitha bankat ruse duhet të bllokohen nga sistemi financiar evropian dhe Rusia duhet të ndalohet nga sistemi SWIFT”.

“Ndërsa mirëpresin miratimin e shpejtë të sanksioneve të BE-së, eurodeputetët duan të shohin masa më të gjera kufizuese që synojnë dobësimin strategjik të ekonomisë ruse dhe bazës industriale. Në veçanti, importet e mallrave më të rëndësishme të eksportit rus, si nafta dhe gazi, duhet të kufizohen. Investimet e reja të BE-së në Rusi dhe investimet e reja ruse në BE duhet të ndalohen”, thuhet në njoftimin për shtyp.

Ligjvënësit kërkuan zgjerimin e një sërë sanksionesh duke përfshirë ndalimin e SWIFT ndaj Bjellorusisë në këmbim të mbështetjes së drejtpërdrejtë të pushtimit rus të Ukrainës.

Ata gjithashtu u bënë thirrje vendeve të BE-së që t’i dërgojnë Ukrainës “armët mbrojtëse më shpejt, në përputhje me nenin 51 të Kartës së OKB-së, i cili lejon vetëmbrojtje individuale dhe kolektive”.

Të gjitha sanksionet që synojnë individët përgjegjës për “korrupsionin e nivelit të lartë” në Rusi dhe Bjellorusi, duke përfshirë oligarkët dhe zyrtarët, duhet të miratohen “me shpejtësi”, thuhet në rezolutë.