Gazi amerikan do të zëvendësojë atë rus në Europë, hapet rruga për më shumë sanksione ndaj Moskës

Përditësuar më: 25/3/2022, ora 10:04

Gazi amerikan do të zëvendësojë atë rus në Europë, hapet rruga për më shumë sanksione ndaj Moskës

Përditësuar më: 25/3/2022, ora 10:04

Bashkimi Europian shpalli arritjen e një marrëveshjeje të re, sipas së cilës do të rrisë sasinë e gazit natyror që do të marrë nga Shtetet e Bashkuara, për të zëvendësuar importet ruse.

Sipas Reuters, SHBA-ja do të sigurojë të paktën 15 miliardë metra kub gaz, deri në fund të vitit për Europën.

Shtetet europiane po përpiqen me çdo mënyrë që të ulin varësinë nga gazi rus, që prej nisjes së pushtimit të Ukrainës. BE-ja është zotuar të ulë me 2/3-t furnizimin me gaz rus, deri në fund të vitit, përmes importit nga shtete të tjera dhe rritjes së përdorimit të energjisë së rinovueshme.

Marrëveshja pritet të shpallet nga Presidenti amerikan, Joe Biden, dhe Presidentja e Komisionit Europian, Ursula von der Leyen, këtë të premte, pas një dite të ngjeshur me tri samite, të NATO-s, BE-së dhe G7-s.

Agresioni i Rusisë, që është njëkohësisht edhe furnizuesi më i madh me gaz i Europës, ka sjellë rritje të çmimeve në nivele rekord në të gjithë kontinentin, përfshirë edhe Shqipërinë. Me zëvendësimin e gazit rus me atë amerikan, shtetet e BE-së do të kenë rrugë të lirë për të vendosur embargo ndaj gazit dhe naftës ruse, diçka që Shtetet e Bashkuara e kanë bërë tashmë.

Ndryshe nga gazi rus, që vjen në Europë përmes tubacioneve, gazi amerikan transportohet përmes Atlantikut në formë të lëngshme, me anije.